Ովքեր են ՀՀ ամենաազդեցիկ դեսպանները
02.04.2013
Slaq.am-ը փորձեց վերլուծել և հասկանալ, թե ովքեր են Հայաստանից տարբեր երկրներ գործուղված ամենաազդեցիկ դեսպանները: Դեսպանների ազդեցիկությունը, ըստ մեզ, պայմանավորվում է նաև այն հանգամանքով, թե որքանով են նրանք կարողանում բարձր պահել միջպետական փոխհարաբերությունները և, բացի այդ, իրենց անձնական հեղինակության և գործառույթների շնորհիվ կարողանում դիվիդենտներ բերել Հայաստանին: Այս տեսանկյունից, ըստ Slaq.am-ի, ամենաազդեցիկ դեսպանը Ուկրաինայում Հայաստանի դեսպան Անդրանիկ Մանուկյանն է:
Նա կարողացել է Ուկրաինայում ձեռք բերել բավականին ազդեցիկ կապեր և այսօր հայ-ուկրաինական հարաբերությունները, բացի պետական մակարդակից, ձեռք են բերել բիզնես-շփումների հարթություն: Այսօր արդեն Ուկրաինայում հայ գործարարներն իրենց ավելի վստահ են զգում և մեծ ներդրումներ կատարելով կարողանում են գումարներ աշխատել: Անդրանիկ Մանուկյանի շնորհիվ Ռուսաստանի հայ գործարարները ևս գումարները տեղափոխում են Ուկրաինա: Սա նշանակում է, որ Մանուկյանը կարողացել է Ուկրաինայում ձևավորել այնպիսի հարթություն, որպեսզի հայերն իրենց ապահով զգան: Բացի այդ, պետք է նկատել, որ Ուկրաինայում Հայաստանի դեսպանը ԲՀԿ առաջնորդ Գագիկ Ծառուկյանի խնամին է, իսկ վերջինս լավ կապեր ունի Ուկրաինայում, հետևաբար Անդրանիկ Մանուկյանը այս կապերը ևս օգտագործելով է կարողացել այդքան մեծ կշիռ ձեռք բերել Ուկրաինայում:
Իր ազդեցիկությամբ կարելի է առանձնացնել նաև Վրաստանում Հայաստանի դեսպան Հովհաննես Մանուկյանին:
Նա ևս բավականին ամուր կապեր է ձևավորել Վրաստանում: Չնայած նրան, որ Հայաստանն ու Վրաստանը բարեկամ երկրներ են, սակայն պետքէ նկատել, որ ամեն բան չէ, որ հարթ է ընթանում հայ-վրացական հարաբերություններում` հաշվի առնելով Ջավախքի գործոնն ու այն, որ ադրբեջանական լոբբին ևս բավականին մեծ է: Սակայն Հովհաննես Մանուկյանին հաջողվել է Վրաստանում ձևավորել հայերի համար ապահով պայմաններ, ինչի արդյունքում ևս շատ հայ գործարարներ մեծ ներդրումներ են կատարում վրացական տնտեսության մեջ` իրենց թիկունքում ունենալով Հայաստանի աջակցությունը` ի դեմս Վրաստանում Հայաստանի դեսպանի: Չնայած դրան, լուրեր են շրջանառվում, որ դեսպանն առաջիկայում վերադառնալու է Հայաստան և իր բնագավառին մոտ պաշտոն է զբաղեցնելու արդարադատության համակարգում:
Ազդեցիկ դեսպանների շարքրից է նաև Քուվեյթում Հայաստանի դեսպան Ֆադեյ Չարչօղլյանը: Չնայած նրան, որ Քուվեյթը բավականին փոքր արաբական պետություն է, սակայն բավականին մեծ հարստություններ ունի: Ֆադեյ Չարչօղլյանի` Քուվեյթում դեսպան նշանակվելուց հետո ձևավորվել է մի մթնոլորտ, որի արդյունքում արաբ շեյխերի և հարուստների հետաքրքրությունը Հայաստանի նկատմամբ բարձրացել է: Նրա` դեսպան նշանակվելուց հետո բավականին մեծ թվով գործարարներ ժամանում են Հայաստան` ցանկություն հայտնելով այստեղ ներդրումներ կատարել: Հենց դրանով իսկ դեսպանի գործունեությունը կարևորվում է և դրանով է նաև որոշվում նրա ազդեցիկության չափաբաժինը:
